ඉංජිනේරු අක්කාගෙන් වේටර් මල්ලීට...

ඉඳුල් වතුර වලට ඇහැකි 

පතොක් ගහක මල් අනින්න 

අට්ටි ගහන පිඟන් මැදින් 

හීන උඹේ ගොඩ ගහන්න 

අප්පච්චී උඩින් ඉඳන් 

කිව්වෙම උඹ බලාගන්න 

ඒත් උඹට ඕනෙ උනේ 

මලක් වගේ මං රකින්න...

උඹේ හිනා වෙන ඇස් වල 

මගේ හීන පැල කරන්න 

උඹේ හීන සේරම ටික 

කාසි වලට දිය කරන්න 

දැන් ඒ ඇති මට ඕනෙම 

හඳ ලඟින්ම උඹ තියන්න 

අපි දෙන්නා දෙතැන තියා 

ලෝකෙට බෑ කරකැවෙන්න...

වැලි කැටේට පුළුවනි නම් 

බෙල්ලෙකුගෙන් මුතු හදන්න 

උඹේ හිතට පුළුවන් වෙයි 

ඉඳුලෙන් මසවුළු හදන්න 

බලා උන්නෙ හුඟක් කලක් 

කවියක් උඹ ගැන ලියන්න 

මං තියාපු ලකුණු උඩින් 

මල්ලියෙ අඩි තියල එන්න...